葉石濤文學紀念館（臺文）

展館介紹 tián-kuán kài-siāu
本建物是市定古蹟山林事務所，佇日本昭和年間起造，專門負責培育、管理林產。西爿面仔起一堵兩米懸的牆圍，東爿是早前的臺南州廳，北爿是圖書館，三爿圍起來做內埕。園仔內青phiàng-phiàng，種幾若欉大樹。其中兩欉南洋杉仔咧欲三層樓懸，量其約仔是民國40年(1951)種--ê，經過久年風雨，相隔30公尺，攏伸向正手爿去。兩欉樹仔倚做伙，佇民間予人號做「翁某樹」。建築規个表面分做洗石仔基座、紅磚仔牆、厝蓋三个部份。
葉石濤文學紀念館2012年開幕，展出作家人生大代誌、作品佮種種文物，來紀念臺灣重要的文學作家葉石濤先生。本館一樓展出葉石濤先生的文學作品，除了有小說作品通看，閣有翕相體驗。展區二樓保存葉石濤先生的藏書、逐工咧寫作的椅桌，閣有人生要事、拜探影片佮專題特展等等。本館有中、英、日、臺文的線頂導覽，歡迎多多利用。

「咱這代的台灣作家只不過是使徒，替後來的人鋪路。」這是葉石濤寄予鍾肇政的批信，內底的一段話。
經過政局替換、語言轉變閣有白色恐怖坐監，葉石濤對一个浪漫識骨世家出身的少年人，成做擔領臺灣文學的使徒。

本區展出葉石濤要事年表，佮相關文物（複製品），𤆬你了解葉石濤性命當中的大代誌。

◆◆◆●●●【展出文物】●●●◆◆◆
葉石濤臺南州立臺南第二中學校出業證書。
葉石濤抄寫台灣省保安司令部判決書。
葉石濤撰寫評論〈孤絕的作家，孤高的文學評舞鶴「拾骨」〉手稿

接續來看：https://www.youtube.com/watch?v=kCCTPsCrG-U
葉老生平年表：https://culture.tainan.gov.tw/theme/table/index?Parser=4,47,307,294

◆◆◆●●●【石濤先--ê 佮音樂】●●●◆◆◆
葉石濤讀中學的時，予日本老師邀請去厝內聽唱片，接觸著法國、芬蘭佮日本等地的音樂。
石濤先--ê 認為音樂的音感表現親像小說結構，捌音樂的作家會當共感情佮人性的起起落落把握了誠好，予文章若流水仝款，充滿音律性的變化。
2001年，石濤先--ê 佮莊紫蓉女士的訪談當中，講著伊誠合意德富司Debussy的音樂。伊共彼看做是一款印象派的無合調音，若像日本御神樂透濫無合調音的合音用法。所致，石濤先--ê 聽著德富司音樂的時，定定會想起日本的御神樂。
接續閱讀：
和家己格手的寂寞作家－訪問葉石濤
http://www.twcenter.org.tw/thematic_series/character_series/taiwan_litterateur_interview/b01_13101/b01_13101_1_
石濤先--ê 毋但聽唱片，也捌學過鋼琴。會曉彈德富司的《月光》、貝多芬的《月光》佮法國作曲家加布里埃·宇厄班·侯禮(Gabriel Urbain Fauré)的《月光》。
◆◆◆●●●【音樂𤆬咧聽】●●●◆◆◆
■本展區設兩組耳機，輪流放送以下樂曲：
★阿詩洛-克勞德·德富司（Achille-Claude Debussy，1862/8/22－1918/3/25）
《月光》（Clair de Lune）
這是音樂家阿詩洛-克勞德·德富司上有名的作品──《貝加馬斯克》組曲當中的第3曲《月光》（Clair de Lune）。創作靈感對法國象徵派詩人魏爾倫的詩作來。
德富司自細漢就沐印象派藝術。伊受著馬斯奈等前輩作曲家開創的法國音樂傳統影響，共東方音樂、西班牙舞曲佮爵士樂的特色敆做伙，嘛共法國印象派藝術手法用佇咧音樂，創造出獨家一派的和聲，伊的音樂影響後輩的作曲家誠深。代表作品有管弦樂《大海》佮《牧神下晡前奏曲》，鋼琴組曲《貝加馬斯克組曲》、《意象集》、《版畫集》等；創作山尖是歌戲《佩利亞斯和梅麗桑德》。
德富司足合意日本浮世繪畫家葛飾北齋的出名木版畫《神奈川沖浪裏》，毋但吊佇厝內欣賞爾爾，1905年發行的交響詩《大海》（La Mer）閣提《神奈川沖浪裏》做總譜冊皮。

作家的條件 Tsok-ka ê tiâu-kiānn
佇石濤先--ê 心目中，做一个好作家，需要啥物款條件咧？

「作家必須具備獨得的「作家之眼」，也就是作家要具備關照人類世界形形色色底事象的能力。」（出自〈作家的條件〉）

「一個有成就的作家必須確信他的工作對於人類社會有所貢獻，而能孜孜不倦、堅忍不拔的寫下去，以反映時代和社會。」（出自〈論吳濁流〈幕後的支配者〉〉）

「作家必須是時代的晴雨計。」（出自〈論吳濁流〈幕後的支配者〉〉）

「堅忍不拔的作家精神，悲天憫人的世界觀，千錘百鍊的文字技巧。」（出自〈論吳濁流〈幕後的支配者〉〉）

「文學的路始終是一條荊棘密佈的路。如果一個作家停止思索與挑戰，陷入自滿的泥沼，那麼他再也不是什麼作家了。」（出自〈懷念吳老〉）

「唯有從發掘鄉土人物的人性中出發，覓取普通的人類共有的人性，對於人類理想主義傾向有所貢獻，才真正算是偉大的作家。」（出自〈鍾理和評介〉）

「誠實是每一個作家應該持有的態度，因為唯有誠實，作家才不被時代、社會之偏見所蒙蔽，而能夠正確地把握住真理和現實，毫無忌憚地用紮實的寫實，把現實世界的諸樣相表現出來。」（出自〈評〈校園裡的椰子樹〉〉）

「一個作家假若企圖如實地塑造這現代人的生活，他必須具備繁多的知識、敏銳多樣的感覺，從潛意識底層來捕捉或解釋人們行為的能力。」（出自〈黃娟的世界〉）

「深刻的心理創傷在經年累月的壓抑和發酵之後突然爆發足以使人發狂而毀滅，也足以使人憂傷終生頹喪而亡，唯有作家把這些創傷化為一股創作的熱情得以超越自己，獲得解脫。」（出自〈評李喬的兩本書〉）

為著欲紀念臺灣當代文學作家葉石濤，臺南市政府文化局用石濤先--ê的名來共文學獎號名， 2021年舉辦第一屆「葉石濤短篇小說文學獎」。

葉石濤予人號做「短篇小說的王者」。伊用短篇小說，來講踮臺灣生活的故事。伊的短篇小說有120篇咧描寫臺南的地景、人物、事蹟，可見故鄉臺南踮葉石濤心目中的地位，影響真深。臺南毋但是伊出世的所在，閣是晟養伊文學創作的搖笱。
臺南市政府文化局向望佇臺灣生活的文字創作者，會當傳承石濤先--ê的精神，用短篇小說講出家己精彩的故事。因為葉石濤短篇小說文學獎有伊歷史的定位佇咧，評審委員攏認為第一屆的首獎應該愛有典範的意義。第一屆投稿的作品內底，佮評審委員的向望無對同，評審委員同齊決定首獎缺額。
葉石濤規世人追求「無土地，哪會有文學」的精神的彼種 為著欲予會當傳承予囝兒序細，佇遮向逐家紹介石濤先--ê出眾的文學貢獻佮親像寶藏的短篇小說，同時鼓勵臺灣作家去創作佇這塊土地面頂上、屬於家己的故事。所致，第一屆葉石濤短篇小說文學獎的首獎獎座，到今猶囥踮葉石濤文學紀念館，成做本館展現石濤先--ê追求臺灣文學精神的象徵。


葉石濤短篇小說文學獎獎座

獎座是專工邀請臺南誠有才情的藝術家蘇小夢設計製作，閣有熟手老練的臺灣文學硏究者張良澤教授為葉石濤短篇小說文學獎的獎牌題字。
設計獎座的理念是用葉石濤的「食夢之獸」來做核心。獎座的基座是用石材來做土地的意象，文學的生命是按這塊土地生成的，嘛佮葉石濤名宇中的「石」做連結。
獎座主要的構造，是用紅銅做成「彎曲鉚釘定型的鐵花窗仔」佮「橫來直去的車路」，代表臺灣都市的景緻佮人文風格。獎章(鉼針)是用銀的材質和傳統的金銀線結合，彼款幼膩的手路，共植物、花蕊閣有尾蝶仔這三種意象合作伙，親像文學家的一生，受著命運的磨鍊，終其尾得著飽仁的創作果子。

「作家本成是一隻靠吃夢生活的夢獸，伊哪會知影這隻夢獸也需要靠麭生活，麭毋是規工眠夢就有的！」 一葉石濤

用白鐵仔線佮紅銅線刺成的「食夢獸」，彼款線路湠甲滿四界的造型，袂輸時間的粒積參創作者的意志，直直走揣一場夢，夢中有創作需要的性命營養分。

1969年5月 第十屆中國文藝協會文藝評論獎
1980年2月 第一屆巫永福評論獎
1980年10月 聯合報文學貢獻獎
1987年 《臺灣文學史綱》獲中國時報文化貢獻獎
1989年8月 鹽分地帶文藝營文學貢獻獎
1990年 臺南師院第三屆傑出校友獎
1991年11月 臺美基金會人文成就獎
1994年 第一屆高雄縣文學貢獻獎
1995年 第一屆府城文學貢獻獎
1998年11月 真理大學「臺灣文學家牛津獎」
1999年4月 高雄市政府顧問
1999年11月 成功大學榮譽文學博士
2000年5月 中國文藝協會榮譽文藝獎章
2000年6月 高雄市文藝貢獻獎
2000年12月 八十九年行政院文化獎
2001年9月 國家文藝基金會第五屆國家文藝獎
2003年 真理大學臺灣語文系客座教授
2004年5月 總統府國策顧問
2005年8月 財團法人文學台灣基金會第四屆董事
2008年 臺南市市鑰

短篇小說的王者 Té-phinn-siáu-suat ê ông-tsiá

葉石濤予人號做台灣短篇小說的王者，伊一世人寫的短篇小說超過150篇。本展區除了準備50外本短篇小說冊，閣收集葉石濤絕版的小說集，邀請你共冊提起來，入來石濤先--ê筆下的小說世界，享受文學豐富的營養分。

來去官網看詳細：https://culture.tainan.gov.tw/theme/form/index?Parser=2,47,314,297

接續來聽：
葉石濤文學紀念館Podcast頻道【食夢的獸】EP.2葉石濤-文學著作
https://open.firstory.me/story/ckpgwgi6ylw4k0812waaqp8vn

◆◆◆●●●【文學行踏 地景地圖】●●●◆◆◆
葉石濤寫著的所在，干焦府城大大細細就咧欲180搭。有的是通人知的景點，譬論講孔子廟、赤崁樓；有的就較少人知，像豆油間、番薯崎；閣有拍銀街、拍石街遮的舊名；嘛有編造出來的葫蘆巷、蝴蝶巷、露螺巷等等。

這爿提供四組路線，行一組差不多3點鐘。邀請你親身行踏石濤先--ê筆下的地點，迵過石濤先--ê的虛實記持，沿途啖菜粽、米糕看覓，浸佇府城獨有的文學之美。

◆【浪漫的心】
葉石濤文學紀念館→警察局→臺南州廳→市議會→大正公園→消防署→銀座通→度小月→林百貨→勸善堂→拍石街→臺南郵局本局→天公廟→草花街→鞋街→竹仔街→拍銀街→傀儡巷→萬福庵→施家大厝→范進士街→外媽的厝→赤崁樓→石舂臼→大媽祖間→葫蘆巷→武廟→皇后戲院→露螺巷→祈福國小

◆【白色的網】
葉石濤文學紀念館→檨仔林→下大道良皇宮→小西門→西門町→宮古座→尾蝶仔巷→寶美樓→米街→五金行→金紙店→大銃街→寶公學校→大舞台→興南客運總站→普濟殿→佛頭港街→水仙宮→看西街教堂→牛磨後→豆油間→淺草市仔→番薯港→盛場(sa-khá-lí-bah)→運河→新町

◆【烏色的光】
葉石濤文學紀念館→孔子廟→末廣公學校(一)→忠烈祠→兵馬營街→大南門→末廣公學校(二)→台南州立第一高等女學校→水道水機構→台南州立第二高等女學校→延平郡王祠→喜鵲巷→順生病院→萬川餅舖→高砂町→公會堂→太平境教會

◆【食夢的獸】
葉石濤文學紀念館→西來庵→城隍廟→辜婦媽廟→台南州知事官邸→耶穌學校→東門城→家政女中→竹園町→州立台南二中→火車頭→中華日報→省立病院→七娘媽廟→聖惠齒科病院→葉石濤文學紀念館

線頂地圖
https://www.google.com/maps/d/u/2/edit?mid=1E0mHme2DknqhiYm7Oi7j2DQhOB5yq7Pr&usp=sharing

接續來看：
佇真實和虛半中央行徙的城市 葉石濤的府城台南https://yehtainan.nmtl.gov.tw/#
台南為何－葉石濤代表的一款見解
https://eyesonplace.net/2019/03/22/11140/

◆◆◆●●●【地景籤詩】●●●◆◆◆
耍甲烏暗眩去？來抽一支鬮仔，看今仔日運勢按怎

照步來耍：
1.抽一支鬮仔
2.照鬮仔頂頭的號碼，共屜仔拍開，提出一張籤詩。

◆◆◆●●●【石濤先--ê宇宙】●●●◆◆

予人號做「短篇小說的王者」的石濤先--ê，用小說建造多元的宇宙時空；遮的角色若像無仝時空的門，等待你來讀in的故事，入去石濤先--ê的文學世界。

接續來看：
小說文本
https://culture.tainan.gov.tw/theme/form/index?Parser=2,47,314,297

葉石濤佇小說內底的祕密身分──用小說創作炤個人佮歷史的性命困境
https://content.teldap.tw/index/blog/?p=3430

◆◆◆●●●【石濤先--ê冊房 】●●●◆◆
◆◆◆●●●【石濤先--ê冊房 】●●●◆◆
來看石濤先--ê咧寫作時的冊房，現場有石濤先--ê厝內的唱機、藤椅、眠床佮電視，有苴佇大腿頂用來寫作的棋盤，閣有石濤先--ê收藏的冊等等物件。

接續來聽：葉石濤文學紀念館Podcast頻道【食夢之獸】EP.3葉石濤-文學冊房
https://open.firstory.me/story/ckpgwg4jplw360812117mn6co

接續來看：
陳令洋：攏佇咧，毋過無存在感爾爾——籐椅佮伊的葉石濤
https://www.tlvm.com.tw/Create/CreatePlatformCont?Createid=44

◆◆◆●●●【描寫石濤先--ê 】●●●◆◆
◆你16歲的時，當咧創啥？
少年時陣的葉石濤，是用日文咧創作文學。
1940年，16歲的葉石濤踮張文環主編的《臺灣文學》投稿，頭一篇小說〈媽祖祭〉，就予人選做佳作，無刊出去，原稿已經拍交落。入選評語刊佇1943年1月31日出版的《臺灣文學》三卷一號面頂。自按呢，葉石濤開始伊的寫作生涯。17歲的時，伊踮《文藝臺灣》發表〈征台譚〉這篇小說；19歲的時，發表的小說〈林君的來信〉刊佇《文藝臺灣》五卷六號，猶閣有小說〈春怨〉刊佇《文藝臺灣》六卷三號。

◆無聲的時代，寫昂聲的文字
葉石濤捌受白色恐怖牽連坐監，無疑悟自按呢改變伊後來的寫作風格。
1951年，葉石濤予人檢舉參加讀冊會，去予人用「知匪不報」的罪名判5冬刑。1954年受減刑出獄。自彼陣，葉石濤的寫作風格愈來愈倚寫實，充滿社會主義的人道關懷精神，替弱勢者發聲。這段予人禁喙的監牢經驗，葉石濤共記錄佇〈獄中記〉、〈紅鞋子〉、〈台灣男子簡阿淘〉等等小說內底。

◆這場半世人的春夢，是為著欲佮赤裼裼的家鄉相倚
1968年，葉石濤44歲的時才出版頭一本小說集《葫蘆巷春夢》；予台北蘭開冊局發行初版，鍾肇政寫話頭。葉石濤家己講《葫蘆巷春夢》反映的是1950年代台灣社會的時景。冊內底仝名的小說〈葫蘆巷春夢〉，頭起先就按呢描述：「現今的葫蘆巷實在是令人洩氣的地方；它是一條湫隘、邋遢的巷路⋯⋯由於房屋毗連，人丁旺盛，到處傾倒垃圾，堵塞的陰溝溢出的污水無處不流瀉，使人找不出一處可以落腳的乾淨地方。」可見現代都市的街仔路毋是一个適合人蹛的所在，了後他閣寫講：「而且終日街上飄揚著刺鼻的異樣臭氣，叫人不得不掩鼻而過。」葉石濤上尾一本小說集《蝴蝶巷春夢》佇2006年8月出版。隔兩年，也就是頭一本春夢出版40冬後，葉石濤佇高雄榮民總病院過身。

接續來看：https://www.youtube.com/watch?v=kCCTPsCrG-U
葉老生平年表：https://culture.tainan.gov.tw/theme/table/index?Parser=4,47,307,294
接續來聽：葉石濤文學紀念館Podcast頻道【食夢之獸】EP.1葉石濤-葉老生平
https://open.firstory.me/story/ckpgwgys1lw6408129rq251lv

◆◆◆●●●【文學史學家】●●●◆◆◆
若無土地，哪會有文學？主張鄉土文學愛「以臺灣做中心」的彼个查埔人

1965年，葉石濤佇《文星》九十七期發表〈臺灣的鄉土文學〉這篇文章，開展日本時代臺灣新文學作家、作品研究的潮流。
1977年4月，葉石濤佇《夏潮》雜誌發表〈台灣鄉土文學史導論〉，伊提出「臺灣的鄉土文學應該是愛『以臺灣做中心』來寫作品」的主張。
這段論述煞予伊絞入去鄉土文學論戰，予人投講伊有分離主義的臺獨思想。長年受著監視、歧視的葉石濤選擇離筆戰離遠遠，注神寫作。
彼當陣當咧戒嚴，「黨外」組織猶未成立，誠歹想像，欲面對這款控訴愛扛偌大的風險，需要偌大的膽頭。不而過，就是這款論點，共臺灣文學重要的地基拍落來，大大影響後尾臺灣文學研究。

◆◆◆●●●本區展出石濤先--ê 著作的外國譯本●●●◆◆◆

◆『台湾文学史』（《台灣文學史綱》）
出版資訊：東京：研文，2000
譯者：中島利郎、澤井律之
◆대만문학사（《台灣文學史綱》）
出版資訊：서울 : 바움커뮤니케이션，2013
譯者：김상호（金尚浩）
◆Giấc mộng xuân trong ngõ Hồ Lô（《葫蘆巷春夢─葉石濤短篇小說》）
出版資訊：Hà Nội: Nhà xuất bản Văn học, 2017
◆シラヤ族の末裔．潘銀花 :葉石濤短篇集（《西拉雅末裔潘銀花》）
出版資訊：東京：研文，2014
譯者：中島利郎、澤井律之
◆台湾男子簡阿淘
出版：法政大學出版局，2020
譯者：西田勝
◆MIMPI BERAHI DI LORONG LABU《葫蘆巷春夢─葉石濤短篇小說》
出版：馬來西亞，2019

啟蒙先生 khé-bông sian-sinn
◆◆◆●●●【啟蒙先生 西川滿】●●●◆◆◆
臺灣文學家葉石濤的啟蒙恩師，是早期推捒臺灣藏書票的其中一个頭人。他佮畫家宮田彌太郎、版畫家立石鐵臣合作設計冊皮、印檫裝釘、發行限量的手工冊，譬喻講《媽祖》、《臺灣風土記》、《華麗島》、《文藝臺灣》等等，展現出厚重浪漫的鄉土色彩，閣有伊對臺灣特別的感情。

《華麗島讚歌》、《咒》、《窈窕》是西川滿送予葉石濤的冊。其中《華麗島讚歌》佇平成8年9月9日發行(西元1996年)，嘛是西川滿為著欲紀念伊的親友，畫師立石鐵臣，所出版的一本詩集，內底收錄立石鐵臣繪製的圖畫。


◆頭一擺見面
1943年，今仔18歲的葉石濤，讀日本佮法國文學誠綿爛，提浪漫主義的創作風格來寫〈林君的來信〉。 這篇文章刊佇西川滿主編的《文藝臺灣》，致使石濤先--ê 正式來踏入文壇，嘛按呢，入去《文藝臺灣》做編輯助理。
石濤先--ê 按呢寫伊佮西川滿頭一擺見面的場面：
「佇我面頭前的是量其約仔四十捅歲、漢草誠勇、面白抹抹、穿一軀白色麻質西裝的日本作家，足有法國詩人的雅氣，嘛足有迷力。我一坐落來，伊就親切的對我微微仔笑，懶懶問我講：「你是？」我的面紅紅，照實共伊報我的名。「我是西川，你就是葉石濤！我決定共你的小說〈林君的來信〉刊佇四月號。想袂到你竟然遐爾少年！十七歲彼跤兜--honnh？真正是緣投的少年家！」

◆綿死綿爛的作家精神
對葉石濤來講，伊對西川滿身上看著一个作家愛有的基本條件：作家應當認真生活，刻苦過日，無暝無日拚命寫到尾。簡單講，作家百面是人道主義者，奉獻佮獻身是作家獨一的謝禮。
石濤先--ê 用按呢的精神過一世人，毋管現實怎樣壓迫，石濤先--ê 迒過日本話、臺語佮華語，這三種語言替換的阻礙。經過戰前戰後、白色恐怖種種悽慘離經，伊猶原堅持，綿死綿爛咧寫作，共臺灣文學的界標插落來。

◆◆◆●●●本區展出石濤先--ê 佮西川滿往來的物件●●●◆◆◆
◆西川滿送予葉石濤的詩集：
咒(括冊橐仔)、窈窕(括冊橐仔)、華麗島讚歌(括冊橐仔)
◆葉石濤講和西川滿熟似的緣由：
寫佇《口述歷史：台灣文學耆碩--葉石濤先生訪問紀錄》高雄市文獻委員會，2002

文壇好朋友 Bûn-tuânn hó-pîng-iú
◆◆◆●●●【文壇好朋友】●●●◆◆
欲了解石濤先--ê 的文學地位，來聽文壇前輩講詳細!
◆鍾肇政
「石濤先--ê 佇臺灣文壇的地位，簡單一句，北鍾南葉，北鍾是我，南葉就是石濤先--ê 。」

小說作家，客人。日本時代佇新竹(這馬桃園龍潭)出世，有台灣文學之母的尊稱，參賴和互相比並。佇臺灣文壇佮葉石濤齊名，兩人予人號做「北鍾南葉」。伊的頭一部長篇小說《魯冰花》發表佇《聯合報》，《濁流三部曲》佮《臺灣人三部曲》是伊重要的代表作。
線頂收看：https://www.youtube.com/watch?v=oX3aI3mAhW8


●張良澤
「石濤先--ê 的文章，我頭一篇讀著的是臺灣鄉土文學論，到今閣不時佇我頭殼內絞滾。」
評論家，日本關西大學中文碩士。規世人拚力咧收集、整理臺灣文學作家佮史料，捌主編四位臺灣文學作家的作品集，包括吳濁流、鍾理和、王詩琅閣有吳新榮，猶有《西川滿先生著作誌》和自傳《四十五自傳》，小說《生存的條優件》等著作。
線頂收看：https://www.youtube.com/watch?v=evK2A5wgi9o&t=3s

◆李喬
「用一句話形容伊，就是：正港的文學人。」「石濤先--ê 伊本人，就呈現出臺灣文學的風格。」

苗栗客人作家，第十屆國家文藝獎文學類得獎人，嘛捌做過總統府國策顧問。伊的創作方向「大多數較倚社會大眾生活面的描寫，替有苦無地講的平民做微弱的代言人」。李喬在生的時，伊家己認為《寒夜》三部曲是伊上重要的著作，彼是記錄臺灣開發佮歷史事件的小說，展現出民族的苦難閣有人性的尊嚴，充滿史詩的氣魄、母愛的光輝佮人對土地的依戀。
線頂收看：https://www.youtube.com/watch?v=dwMuQsgw5QY

◆彭瑞金
「伊認為臺灣的文學，應該愛有家己的一條路，臺灣的文學，應該愛有家己追求的方向。」

新竹人，出名的臺灣文學評論家。捌做過《文學臺灣》主編、鍾理和文教基金會董事兼創會祕書長。伊的文學史觀點繼承葉石濤本土寫實的立場，認為文學毋是脫離社會、土地佮人民的獨立存在，只有虔心反映臺灣社會佮民眾生活的，才是正港的臺灣文學作品。
線頂收看：https://www.youtube.com/watch?v=Qk1aafZSsfE&t=8s

本展覽室绁落來會推出活動佮特展 歡迎參觀
佇螢幕邊仔展出的，是已經過身的畫家陳國進，2012年為葉石濤文學紀念館開幕創作，猶未赴完成的油畫作品。這嘛是陳國進老師在生上尾的遺作。畫裡的石濤先--ê 掛目鏡，彼款親切的模樣，若像展開手股咧迎接老朋友，毋捌離開。無論是雕塑、畫作抑是墨寶，毋但展現出石濤先--ê佇文壇的重量，閣有在世的人對伊的數念佮致意。

往過特展：
你敢會佮我同齊拍拚到尾? 南葉北鍾批信特展
https://popworld.cc/guide/9688/preview
接續來聽：
葉石濤文學紀念館Podcast頻道【食夢之獸】
https://open.firstory.me/user/ystlmm-culture