常設展「南國故鄉」導覽 (臺灣台語)

逐家好，歡迎來到柯旗化(Kua Kî-huà)的故居。若講著柯旗化，毋知您的第一个印象是啥物？相信多數的人會想著《新英文法》這本冊。對足濟五○年代、六○年代彼陣的高中生來講，《新英文法》是一定愛讀的英文參考冊，差不多每一个人攏會有一本。若準佇政治清明穩定的時代，凡勢柯旗化這世人就干焦是一个文法學家。毋過，活佇白色恐怖的時代，柯旗化就親像彼當時，真濟前途無量的智識份子仝款，無張無持hông關入政治烏牢，性命受著無情的蹧躂。

不而過，伊並無因為按呢就消沉、失志。出獄了後，伊參與民主運動，拚勢宣揚臺灣本土文化。會使講，伊毋但是一位優秀的英文文法的教學專家，閣是一位勇敢的民主鬥士。

面對喝來就來的變故，伊佮親人攏經歷過一段艱難的歲月。這間厝見證白色恐怖時期，政治受難者佮伊的家屬的經歷交織出來的歷史文化內涵。這馬，咱就鬥陣行入去厝內，透過遮的批信、文物佮情境裝置，來回顧柯旗化的一生，來了解伊佮親人佇彼段時間所發生的點點滴滴！

這棟建築物是六○年代的設計風格，外觀的線條簡單、樸實(phoh-si̍t)。內部攏總有四層樓，一樓是柯旗化彼時開的出版社，二樓和三樓是伊佮厝內的人做伙蹛的所在，四樓往過是囡仔拍乒乓(phîn-phóng)閣有栽花草的所在，落尾因為欲做倉庫才搭鐵厝，閣專工鬥電動吊掛機，通好搬大量的冊。

柯旗化是按怎欲開出版社咧？因為伊佇學校教冊以外，嘛佇厝裡的樓跤設補習班。開班的時，攏總有欲倚一百个學生來報名，真受歡迎。紲落，伊閣共補習班的教材整理出版，做英文參考冊，濟濟的家長、學生攏來交關，真緊就賣了了。為著予出版工課閣較順序，伊決定開一間「第一出版社」。雖然佇出版業務愈來愈交易(ka-ia̍h)的時，柯旗化煞予人掠去坐監，毋過，出版的工課並無因為按呢就來停睏。

出獄了後，柯旗化透過第一出版社推捒臺灣文化，嘛創辦雜誌。這馬出版社猶咧經營，對1958年成立到今，已經超過一甲子矣。

柯旗化的性命故事予咱看著臺灣民主佮人權發展的過程裡，伊的付出佮犧牲。所以，2004年高雄市政府特別共遮指定做歷史建物，紀念柯旗化對臺灣民主佮文化的貢獻。

柯旗化1929年出世，伊的老爸是臺南善化人，老母是高雄旗山人，伊的名—「旗化｣就是分別取爸母故鄉地名其中的一字來號的，若像向望伊毋通共故鄉放袂記，嘛代表對故鄉的愛。

柯旗化自細漢就誠gâu讀冊，毋但以第一名的成績對左營公學校畢業，閣考牢高雄中學。彼當時，高雄中學的學生多數是日本人，臺灣人干焦占少數，伊有才調考牢高雄中學是足無簡單的代誌。

因為厝內經濟無好，柯旗化無法度繼續讀起去(lih)一般的大學，只好拜託老爸予伊去考公費的師範學院，也就是後來的國立臺灣師範大學。落尾，伊成功錄取第一志願英文科。柯旗化足愛讀冊，佇咧師範學院期間，伊看真濟歷史、哲學佮精神分析這方面的冊，這予伊的眼界變甲真開闊。

畢業了後，柯旗化成做一位熱心教學的英語老師。伊轉去高雄教冊，捌佇旗山中學、高雄市立一中、高雄市立女中佮高雄中學做過英語教師，憑伊優秀的外文能力，嘛做過美軍顧問團的翻譯官。這馬咱徛的所在，就是𪜶(in)以早的客廳，這排大大排的冊櫃內底，有囥真濟柯旗化過去收藏的冊，咱嘛通想像伊較早佇遮讀冊讀甲真綿爛(mî-nuā)的模樣。

二二八事件爆發的時，面對臺灣政治氣氛大轉變，柯旗化感覺悲傷閣憤慨。伊的生活簡單樸實、無要意功名，毋捌想講家己有一工會受著同學牽連，hông掠去審問。

1951年7月31半暝，特務人員對柯旗化厝內搜著一本《唯物辯證法》。對柯旗化來講，唯物辯證法干焦是一種哲學思想，伊並無認同馬克思主義。真可惜，無論柯旗化按怎解說，猶是hông安罪名送去火燒島思想改造，這是伊頭一改hông掠入監牢。

後來，佇1961年10月初4的過晝時，國民政府第二擺以叛亂罪共柯旗化掠起來，這遍，柯旗化連衫都袂赴穿好，雄雄就hông押起去吉普仔(jì-puh-á)面頂。伊的名嘛hông刁工彎話做「變化國旗｣的意思。這改坐監關15年，伊的身體佮心靈攏受著痛苦的折磨，這是伊一生無法度解脫的惡夢。柯旗化落尾出獄轉去厝裡，定定佇睏眠當中陷眠，驚惶、直直躘(liòng)，袂輸咧反抗啥物。

食老的時，柯旗化完成伊的自傳，這袂書若共伊這世人愛做的代誌完成仝款，伊講：「該當做的，攏做了矣｣。了後，伊的語言、行動的能力就開始退化，最後診斷出失智症。2000年，高雄地方法院判定柯旗化有影是無緣無故hông關押，倒佇病床頂的柯旗化終其尾得著平反。

柯旗化被帶走之後，柯蔡阿李為了讓孩子不受到影響，只簡單告訴孩子們：「爸爸在美國｣。耶誕節的時候，就去買舶來品，假裝是柯旗化從國外寄回來的禮物。除此之外，她平常就和孩子們討論《基督山恩仇錄》、《悲慘世界》這些世界名著，告訴孩子們被關進監牢裡的人，不一定就是做錯事的人。

隨著孩子們年紀不斷增長，也開始對爸爸長年不在家感到懷疑。大兒子柯志明雖然懷疑，但是不敢多問。女兒柯潔芳則發現父親信件寄來的地址，竟然不是美國，而是台東！柯蔡阿李知道終究掩蓋不了事實真相，才拿出判決書讓孩子們知道父親現在在哪裡，並且向孩子們解釋判決書很多敘述是捏造的，柯旗化是個愛臺灣的人，絕對不會背叛國家。因此，在孩子們心中依然非常尊敬柯旗化。

平常柯旗化只能透過柯蔡阿李寄來的信件和照片得知孩子們成長狀況，相隔十多年之後，終於第一次在監獄中與孩子團聚，見到柯志明已經從稚嫩的幼童長成青少年了，心中感慨萬千，但父子二人卻一點也不生疏，相談甚歡。

這裡是柯旗化一家的起居空間，不只可以看到他豐富的藏書，更可以戴起耳機，聆聽柯蔡阿李女士與柯旗化大兒子柯志明先生對於「爸爸在美國」這段回憶的訪談。

毋過囡仔總是會大漢，對老爸久年來攏無轉來厝裡這件代誌，嘛開始懷疑。大漢後生柯志明雖然懷疑，毋過毋敢加問。查某囝柯潔芳煞發現老爸寄批的地址，根本毋是美國，是佇咧臺東！柯蔡阿李知影真相無法度閣再掩崁，共判決書提出來予囡仔知影老爸人佇咧佗位，嘛共囡仔解說判決書真濟內容攏是假造的，柯旗化是一个愛臺灣的人，絕對袂反背國家。所以，佇囡仔的心肝底猶原足尊敬柯旗化。

平常時柯旗化干焦會當透過柯蔡阿李寄來的批信佮相片來了解囡仔成長的狀況，經過十外年了後，總算頭一改佇監獄佮囡仔團圓，看著柯志明對幼茈(iú-tsínn)的囡仔變做青少年，伊心內真感慨，毋過爸仔囝一點仔都袂生份，足有話講。

遮就是柯旗化一家伙仔生活的空間，這个所在毋但通看著伊收藏真豐富的冊，咱閣會當共耳機掛起來，聽柯蔡阿李女士佮柯旗化的大漢後生柯志明先生講「老爸佇咧美國」這段回憶的訪談內容。

柯旗化佮柯蔡阿李雙人是透過朋友紹介來熟似的，彼當時，柯旗化經歷過頭一改送管訓，對火燒島坐監轉來，毋過柯蔡阿李全然無要意，伊認為柯旗化無做毋著代誌。就準講老母反對，柯蔡阿李猶是堅定欲做柯旗化一世人的牽手。這馬這个所在，就是𪜶(in)翁仔某搬來遮了後的主人房。

結婚了後兩个人不止仔無閒，三个囡仔相連紲出世。想袂到，結婚才六年，柯旗化又閣hông掠去關，幸福的日子喝停就停。

柯蔡阿李為著三个細漢囡仔，干焦會當共悲傷藏起來，雖然受打擊，致使身體破病，伊猶是堅強面對未來的生活。

柯蔡阿李家己有工課愛做，閣愛照顧囡仔佮發落出版社。有閒的時，嘛愛替柯旗化攢各種冊、營養品佮食的物件。佇寄予翁婿的包裹(pau-kó)內底，有柯蔡阿李滿滿的關愛，逐禮拜的固定通批，嘛成做兩人心靈的寄託。落尾，柯旗化的刑期hông無理由就延長，柯蔡阿李甚至向當時的行政院長—蔣經國先生投書陳情，伊願意用家己的性命擔保，來換柯旗化出獄。

柯旗化佮柯蔡阿李雙人堅定的感情，成做互相的力量，予怹度過性命裡的大風湧。

詩人陳惠馨捌用柯旗化的故事寫做一首詩，名就號做〈新英文法〉。詩作當中寫講：「…伊的名佇威權的行列中跳來跳去，文法hông打壓甲毋成(m̄-tsiânn)文法，用專業抵抗心靈的創傷…｣每一字、每一句攏反映出柯旗化當時的遭遇。

佇柯旗化的冊房內底，咱會當鬥陣來了解伊的文學人生。出版英文教材是柯旗化一生的志業，雖然《新英文法》已經再版真濟改，柯旗化猶原感覺有欠缺，佇環境無好、資源閣少的監獄內底，柯旗化認真增補修訂《新英文法》。同時，嘛創作〈南國故鄉〉佮〈一曲難忘〉這兩篇小說。這兩篇小說的主角，攏有柯旗化的形影佇內底。比論，〈南國故鄉〉的主角深深思念家己的故鄉，就親像柯旗化人佇監獄內底的心情。

柯志明捌講過，老師佮文法學家以外，伊的老爸上佮意的頭銜就是詩人佮文學家。出獄了後，柯旗化想欲共家己的遭遇寫出來，伊認為詩的特性，短閣有力，嘛會當暗暗仔比喻，所以伊開始寫詩。伊的詩真有鄉土意識佮政治批判的風格，其中上重要的代表作就是〈母親的悲願〉，這首詩是用來紀念佇二二八事件彼陣hông銃殺的學長余仁德。

1979年高雄爆發「美麗島事件｣，這是臺灣民主運動史內面不止仔重要的政治事件。柯旗化受美麗島事件的影響，積極投入推捒臺灣民主佮本土文化的事工。伊共逐間冊店討所有佮臺灣文化有關的冊目，共做伙編做《臺灣文化圖書目錄》，提供予各界學者佮社會人士研究參考。彼陣，逐家攏知影若欲買佮臺灣文化有關的冊，就愛去第一出版社交關。

1986年，柯旗化創辦《臺灣文化》雜誌，刊登人權、政治佮文化議題的文章。另外，閣有設固定的台語專欄，會當看出伊是用心咧推捒台語。猶毋過，因為內面有一寡文章牽涉著批判政府，閣有鼓吹臺灣獨立的思想，落尾煞去hông查禁、停刊。

伊嘛捌上街頭去參與社會運動，也定用真有力的評論，來表達伊對政治改革的期待。伊所向望的未來，就親像伊佇〈美麗島的春天〉這首詩所寫的按呢：
「…予臺灣文化的根，深入故鄉的土地；
予民主的回聲，傳遍歡喜的山河；
從此人人自由，從此人人平等，
從此是一个和諧友愛的
美麗島。｣

今仔日的參觀結束了後，你敢有體會著臺灣民主化的過程，有影是真無簡單咧？歡迎你繼續追蹤柯旗化故居的官方迷眾頁，分享你對柯老師佮臺灣民主運動的感想。轉去了後愛會記得繼續關心人權議題喔。若欲予臺灣閣較好，需要咱逐家做伙相楗。
這遍的導覽到遮結束。真感謝你來參觀，期待閣一擺的相會！