國立科學工藝博物館｜鬥陣趣科工 歡喜學臺灣台語｜臺灣台語智慧導覽

多羅3051年，地球季節春天，閬雨縫出日，我是旅行日記紀錄者皮卡貝phî-khah-puè，多羅曼斯星球tshenn-kiû人，今年一百歲，當咧星際sing-tsè漫遊ê旅途lú-tôo，這是101歲成年儀式。

舊年皮卡貝佇波德星系sing-hē，太空船無細膩去磅著國際太空站ISS（International Space Station），好佳哉地球太空人jîn琳琳人媠閣好心，講伊袂kah我計較這改意外，而且欲共皮卡貝鬥相共，完成星際漫遊旅途ê研究，紹介地球人太空飛行（hui-hîng)ê智識

林琳建議皮卡貝來到伊ê故鄉--地球ê台灣，遮有一間科學工藝博物館，這內面ê太空飛行探索館，會使幫贊多羅曼斯星球tshenn-kiû所有研究，閣會使替林琳紮一項重要ê物件轉來。

這就是皮卡貝來到遮參觀ê機緣，over。

多羅3051年，地球季節熱人，烏雲密佈，我是旅行日記紀錄者皮卡貝。

食飯會使講是所有多羅曼斯星球人上期待ê活動，聽地球人講食飯皇帝大。毋過佇太空船內底，食飯是艱難（kan-lân）ê任務。
太空食品ài代先考慮ê，就是太空船的空間有限佮火箭發射的重量限制，所以lóng設計做輕koh細。皮卡貝頭拄仔踅一輾去翕地球人ê太空食品，差不多攏是一寡敨開隨會當食ê：親像果子豆、麥仔角、大餅等等。閣有皮卡貝上愛ê Tsioo-khóo-lè-tòo 豆。這予皮卡貝真有感受，頂改同伴波魯福來坐我ê太空船，想欲泡一杯地球人上愛ê咖啡，皮卡貝險險予佇太空船內底烏白飛ê湯匙仔撞著目睭，真正足危險！

因為重力tiōng-li̍k ê關係，有寡太空食物有湯，這寡液體tī太空就親像膠水，表面張力予食物結規丸，抑是黏佇湯匙仔，袂四界飛。食物ê包裝通常會掛吸石抑是黏毛帶，予太空人（jîn）方便共in ê食物、碗箸，固定teh壁kah桶盤，較免食物佇太空船內底四界飛，造成危險guî-hiám。

這就是對地球太空食物ê觀察，over。

多羅3051年，地球季節熱人，天氣清彩，我是旅行日記紀錄者皮卡貝。

佇地球人蹛ê太陽系，除了kng-iànn-iànn ê恆星hîng-tshinn 太陽，皮卡貝捌用太空船內底ê偵查tsing-tsa設備siat-pī觀察行星，發現in本身攏袂發光，只是反射日頭光，因為太陽吸引力，這八粒行星會照（tsiàu）家己ê軌道踅太陽--另外一个特別ê所在，這八粒行星會清除家己軌道附近ê物件，太陽系行星運動ê情形，浩大hō-tāi壯麗遮爾仔出眾tsiòng。

皮卡貝落尾有傳信息問teh太空站ê林琳八粒行星ê資訊，伊講地球人共八粒行星分做二類：

較倚太陽ê岩石質（gâm-tsioh） ê行星：水星tshinn、金星、地球、火星，外層是岩石，核心是金屬。紲落來是木星、土星、天王星、海王星主要組成是氫khin佮氦hāi ê巨行星，看起來只有岩石質行星較適合多羅曼斯人kah地球人來活動。

補充觀察重點：第一，這八粒行星當中體積上大ê是木星；第二：離太陽上遠的是海王星，伊表層ê溫度嘛較低。

這就是對八粒行星ê觀察，over。

多羅3051年，地球季節熱人，落西北雨，我是旅行日記紀錄者皮卡貝。

佇地球觀察ê旅途，皮卡貝捌探索月球，抑就是彼粒地球人叫做「月娘」，守護地球ê天然衛星uē-tshenn

太空人林琳真了解太空任務jīm-bū，伊講早前的太空任務攏kah月球有關係，佇2000年尾期，真濟太空任務發現月球表層有「水合作用」；仝一个時間，地球科學家佇月球岩石見本lih發現著水。自按呢，地球人認為月球頂頭有水，太空人ê工課就是踮月球tshiau-tshuē水源，林琳講這是硬篤閣久長ê任務。

好佳哉，林琳做工課ê太空站有Nasa開發ê 無人探測車VIPER，我拄才佇博物館體驗著，這台工具車功能削削叫，會使代替太空人佇月球南極漫遊、搜揣水冰。透過伊提供ê資訊，去了解月球ê水源頭kah分佈，這粒天然衛星（uē-tshenn）ê研究可能對未來地球人執行太空探索真有路用，成做太空人食水、做火箭材料真重要ê資源。

耍了真忝，今仔日先紀錄到遮，這是對月球探測ê觀察，over

多羅3051年，地球季節熱人，天氣日頭雨，我是旅行紀錄者皮卡貝。

皮卡貝teh太陽系旅行中間，上驚ê就是太陽風暴（hong-pō）。太陽除了發光發熱，嘛會產生帶電的電漿粒子（lia̍p-tsú），大量ê粒子釋放（sik-hòng）湠出去，就會產生太陽風暴。

像這台電動ê 模擬（bôo-gí）畫面，日冕物質若向地球噴射，太陽風暴高能ê粒子幾十分就到地球附近，影響會維持一工至四工，對電力產品可能有嚴重ê破壞。

這就是為啥物皮卡貝真驚太陽風暴，若是發生teh靠電力維持星球運轉ê多羅曼斯星球，根本是災難，阮ê科技上無倒退100年。

這就是對太陽風暴ê觀察，over。

多羅3051年，地球季節熱人，天氣晴和無雲，我是旅行日記紀錄者皮卡貝。

林琳是坐一款號做火箭ê高速飛行機來國際太空站ê。火箭飛行ê原理皮卡貝看來是真簡單，共推進器點予著所產生的氣體，對火箭尻川衝tshìng出來，火箭就有動力走進前，啥物碗糕，按怎就比袂過阮多羅曼斯ê吸石漂浮phiau-phû太空船。

毋過林琳上佮意火箭，伊講伊上愛ê火箭是美國國家太空總署NASA當初佇阿波羅計畫kah太空實驗室使用ê載運tsài-ūn火箭號做農神五號，嘛有人講土星五號，因為伊是頭一个踏佇月球塗跤ê地球人Armstrong坐ê火箭。

這台會使共人載ê火箭，大約懸110公尺（pah-it-kong-tshioh）、三千公噸，是地球到今使用過上懸上大上重ê火箭。而且伊是濟kue̍h拋棄式液態燃jiân料火箭，飛到太空半空中會自動共無愛挃ti̍h ê部份挕捒，火箭加速閣較輕可。

因為地球人科技進步，火箭部份ê材料改用thuànn纖維，ia̋n-jín那來那精良，燃料較省，動力較強，地球人敢若誠勤儉khîn-khiām，這馬閣研究火箭回收ê技術，予火箭發射ê成本降低，一改回收就省欲千萬美金。哎，若換做皮卡貝ê薪水，已經會使閣買三台多羅曼斯太空船ah

這就是對地球火箭ê觀察，over。

馬蒂，遮是大頭博士(phok-sū)，工作(kang-tsok)代號BH9547(kiú-ngóo-sù-tshit)，請你查(tsa)詢今仔日愛修理ê古物。馬蒂？電腦馬蒂！敢有聽--ê？eh，哪遐費氣，我是對（tuì）「時空(sî-khong)工程系」出業ê博士博，明明會當共研究院做閣較厲害ê時光(kong)機，想袂到竟然予人派來修理這台老古董「山海一號」（san-hái-it-hō），我迸矣(Guá piàng--ah)，這台漚古(àu-kóo)　ê時光機meh-tah，年代指針攏袂行ah，哼，才毋是因為我頂改無細膩共珍珠奶茶捙倒teh機械，這台時光機早就愛退休啊！

（咳）好lah，我承認，是因為珍珠落佇時光機meh-tah，「山海一號」才會歹去，這台時光機會tuì無仝時空ê發明家遐偷提一寡毋知佗位來ê古物，按呢代誌就大條ah，咱愛趕緊kā 古物修理予好，靠山海一號送轉去正確ê年代，還予發明家。若無，咱人類科技發展歷史就真正去了了ah！

哎，真正是掠蟲來尻川擽，「山海一號」今仔日提轉來ê古物曷ia̍h傷過濟，hēnn……，詳細共看，遮--ê機械佮模型（bôo-hîng）敢若攏tsham印刷有關係呢，而且是一種特殊ê文字印刷技術，號做「活版印刷（ua̍h-pán)」，電腦馬蒂共我講，這款技術通常使用柴刻字、金屬抑是黏塗字母徙位來印刷，取代（tshú-tāi）人工（jîn-kang）抄寫（tshau-siá）kah 柴雕印刷。彼當陣就有人kah我平巧，發明印刷術，印刷效率加真緊。

咱一步一步來看活版印刷ê過程，頭起先，用銅模（bôo）鑄造（tsù-tsō）鉛字（iân-jī），揀一字想欲做字母ê銅模，下落鑄字機，共鉛角熁予鎔去，倒入去銅模內底鑄做鉛字。第二步是抾字，看印刷ê內容tī字盤揣欲愛ê鉛字。第三步，排長短，大細字排予齊，共鉛角設佇咧縫，弓予好勢。第四步，拍樣，較免印毋著去，會先共格仔提去拍樣機，若有毋著隨改隨試印，拍樣好勢才閣印刷，裁過佮線裝訂（tìng），按呢就完成ah！

Á，原來活版印刷遐爾仔複雜，莫怪今仔日愛修理ê古物遐濟款，按呢愛趕緊共遮修理予好勢，較緊提la̋i還予發明家。

我佇這个櫥仔搜著銅模矣，足讚呢！馬蒂，你頭拄仔講鑄鉛字頭一步ê銅模，是塌落去ê字母，有成印仔陰刻，毋過是銅金屬做ê，料身柔軟配合鑄字機鑄做鉛字ê字母。

喂，馬蒂，緊提雷射來復原這个銅模，摁，袂䆀，字母高尚有雅氣，真有讀冊人ê範，呃，字劃敢若是書法ê款式，這敢是「風行銅模」？我會記「風行銅模」是台灣這馬ê正楷（tsiànn-khái）字母，是一間號做「風行鑄字社」的工場做—ê，電腦馬蒂講，1949年初（tshue）「風行鑄字社」負責人許鴻璋（Khóo Hông-tsiong）先生共伊鑄字ê事業移轉來台灣，tuì廈門來ê「風行上海正楷（tsiànn-khái）字」真媠款，是1949年官方單位指定使用ê字母，抑是蔣介石指定排印駐外（guā）大使（tāi-sài）聘書（phìng-su）ê字母。

好啦，修理好ah，欲共風行銅模囥轉去櫥仔底。

我提儀器掃描這字面捅出來ê鉛角，發現五金成份有「iân」、「àn-tsih」kah「siah」，毋過鉛占上濟，莫怪號做「鉛字」。「鉛字」嘛有人講是「活字」，字面四四角角，有橫逝有直逝，雄雄一下看亂七八糟，毋過無仝鑄字廠，鉛字ê懸度、大細、字面ê整齊度攏是統一用鑄字機鑄做，頭拄仔儀器掃描有檢查著，鉛字ê腹肚邊無仝樣ê刻劃就是鑄字廠做ê記號。馬蒂，過來檢查壁角彼台鑄字機，我已經整理好ah，確定kah大眾排版ê標準、印刷需求有相仝ah！

Ah，害ah，無細膩去挵著格仔，若是欲共復原愛開真濟時間……喂？哪會無落落來？好佳哉，格仔有設計做趨趨，真巧，敢是驚有人嘛無細膩去挵著ê款？哈哈！

我來看覓，馬蒂，請你投影彼个年代印工teh做排版工課ê影片，Ha̋nn，是遐爾仔厚工，干焦看印工tuì格仔揣欲排版，一字一字á抾欲愛ê內容，我就直欲睏去ah。馬蒂，請你加速放影，tsa̍p，猶閣咧抾？毋是呢，這馬teh「排版桌」頂懸共字稿照順序排予好，頭前尾仔空白無字ê所在愛設空白khàng-pe̍h鉛角，字若欲隔巡，用kheh一巡一巡落去格，尾仔師傅會佇四箍圍囥柴枋，用棉紗線縛予絚拍活結固定，然後囥佇下面存版盤kah盤架，敢是按呢就完成ah？

原來如貓，干焦是排長短就遐爾仔費神，毋才有遐濟「號外」，佇彼个資訊傳播真僫ê年代，代誌發生了後，做活版印刷愛經過真濟人工（lâng-kang），欲佇報紙臨時追加內容luē-iông是誠tsiânn困難的代誌。

頭拄仔開傷濟時間teh看印工排版ê放送，這馬無欲閣看，來試看覓按怎扞拍樣機。馬蒂，這台拍樣機敢是鉛字版專用？實在真趣味，想袂到閣會當手動操作，共拄才排版ê鉛字版囥leh遮，印紙樣，呃，敢若減一字去，閣試看leh，無要緊，聽人講紙樣攏會對稿三四擺，見本攏無問題才會印刷。

齁，總算是攏無問題ah，機器嘛無啥物狀況。真好，來去看上尾一站ê印刷

真濟機器呢，遮有兩種早期較捷看著ê手動活版印刷機，我先來檢查頭一種圓盤印刷機的印刷狀況，摁，色彩鮮沢，若發現印毋著去，隨印隨改，適合少量sài-sù細ê，親像me51 tsi11、卡片。

第二種輪轉（lûn-tsuán）印刷機，分做對碖仔頂懸下紙ê高台式kah下面lún ê平台式，台灣上濟ê是平台式機型，這種機械ê原理是利用碖仔佇膨版平面碖，碖仔kah版面會tsua̋nn直直接觸，壓力平均（pîng-kin）,印刷效率好。無毋著，這就是印報紙ê機型，只要是一般膨版平面，親像冊、雜誌攏會使印。

欸？這台活版印刷機，山海一號竟然閣紮「Hopkinson & Cope Albion印刷機」轉來，彼會使講是1860年代金屬全手動印刷時代ê產品，是全手動印刷機！

馬蒂，請你查詢「15世紀，古騰thîng堡pó，木製印刷機」ê資料結果，嘿，看起來這台這台機器ê祖先「木製印刷機」，又閣叫「捲螺kńg-lê印刷機」，佇15世紀改良了後有濟濟使用，然後一直修改，到16世紀，為著增加使用年限，將捲螺仔ê零件材質換做鐵，增加硩紙ê格仔，用羊皮紙包起來，墨水較袂tòo去別位，為著改善鉛字懸低坎，共布繃佇紙篋仔，tsū佇紙kah印版中間。17世紀加壓杆加較重，予壓盤自動夯giâ起來，號做荷蘭印刷機，後來佇1630年、1640年傳去英美。誠實工藝機器不管是當時hőng發明出來，攏一直teh進化。

閣等下，山海一號！這台機器真緊就修理好，送轉去發明家遐。

你看！馬蒂！咱發現tio̍h啥？這是公尺副原器（Kong-tshioh hù guânkhì）！好佳哉，無去hōo時空亂流破壞。

啥？你teh講啥？這干焦是一支普通ê尺niā-niā ？Ueh--! Ueh--！馬蒂！敢是亂流hōo你網路運轉速度變較慢？詳細看leh，這是300年前法國人解決長度標準困擾ê重要寶物。
Tī西元1795年，法國科學院ê天才先輩，kā 北極到赤道這段距離分做一千萬份，一份就是一公尺。為著欲hōo所有ê人了解一公尺生做啥款，in就用「白金」做一支尺beh hōo全世界做標準。後來，為tio̍h beh hōo 長度koh khah 精確。In kā 這支尺 原來ê 材料換做「白金」kah「銥（i）」ê合金，較bē因為溫度變化長度改變！材料換新了後會當講是全面升級

ah！馬蒂！馬蒂！你敢知影？彼當時是世界大國ê法國，kā這个公尺副原器扣做31支分hōo其他國家。日本政府提著一支，in轉來了後koh根據這个標準koh再扣三支，其中一支囥teh台灣，當做台灣地區ê長度標準。
好矣！馬蒂！你慢鈍ê網路速度應該ài運轉ah！這馬，咱ê任務就是kā這支tī台灣ê公尺副原器修理好勢，送伊轉去正確ê時間。無，世界ê長度標準就beh大亂矣。

馬蒂！Kā我磅pōng看māi體重偌重，經過亂流了後，我敢若有較瘦。
「tih-tih-tih！體重磅好矣！154.32！」啥物？單位敢是公斤？這哪有可能？馬蒂！
啊！我知矣！你看這个公斤副原器（Kong-kin hù guân khì）！一定是因為伊走毋著時代，現此時重量標準毋才無仝款。這个公斤副原器kah頭拄仔彼个公尺副原器是仝時期出現ê，lóng是因為法國政府提出「公制制度」來製造。Tī西元1795彼年，in kā公尺副原器當做標準，kā一个長、闊、懸lóng是10公分、4度C ê 純水ê重量訂做1公斤。後來就親像拄才講--ê，西元1872年，法國政府mā kā材料換做，仝款「白金」kah「銥」ê合金，較bē因為溫度變化重量改變！in khok 40个hōo全世界。
這馬這个就是彼當時日本送來台灣ê原器ê複製品。馬蒂，咱做伙kā修理好勢，送轉去正確ê年代！按呢就通知影我真實的體重矣！

馬蒂，替我掃描這个天秤（thian-pîng）！毋好 看伊無，感覺伊輸hōo現代ê電子磅仔，伊tī彼當時是非常精密ê儀器喔！

Tī日本時代，這个天秤就是臺灣總督府專賣局提來檢定市場ê磅子上重要ê儀器。這個天秤上重會當磅到30公斤，精密度是50毫克呢！所以，馬蒂，掠準kā你囥起去，伊mā會使精準測量！

二戰了後，伊hőng送去臺灣省度量衡檢驗所，tuì日本時代一直使用到西元1970年，會當講是台灣重要ê儀器之一啦！馬蒂，咱趕緊kā這个天秤修理hōo好，然後送伊轉去日本時代！

馬蒂，咱用頭拄仔ê天秤來磅這寡磅子（pōng-tsí）！毋通看遮普通普通，in是tuì日本時代到今kàu-tann，是彼當陣提來檢定民間市場用ê磅子ê標準單位。
彼時，逐家ài kā beh檢定ê磅子囥tī天秤一爿，另外一爿囥重量標準器。
就親像是teh耍吭翹板，看天秤二爿敢有平懸，來確定民間ê磅子敢有符合重量標準。

馬蒂，你鬥揣看科技寶庫內底有幾種重量單位ê磅子。公制、英制、台制，抑koh有日制單位。喔！原來咱收囥四種重量單位ê磅子，範圍tuì重ê到輕ê，啥物lóng有neh。

馬蒂，咱這馬來修理磅子，hōo磅子kah天秤做伙轉去in ê年代！

馬蒂！你來看這个神奇ê四角篋仔，伊叫做米升，是「第一檢定用四角量器」，毋好看伊生做敢若做雞卵糕á ê 量杯，伊是提來檢定米、粟仔、種子這款物件ê體積！呃？這馬敢毋是攏照秤重ê？為啥物無欲閣繼續用米升來量米咧？

彼是因為進前有人teh量米抑是種子ê時陣，偷偷仔做跤手，事實上無量出來ê遐濟。
你想看覓，米升若先kā貯予tīn，閣kā tǹg-tǹg 予實，是毋是就無本底看起來遐濟，所以後來就改用秤重的較無爭議，這就是為啥物咱去買米，包裝頂懸是寫「公斤」毋是「公升」

這組量器有6个，上大ê拄好貯一升，上細ê干焦5觳。馬蒂，咱趕緊kā修理好送轉去日本時代，猶teh用量器ê年代。

馬蒂！你看！是小教授1號！啥物？你竟然毋捌聽過？小教授1號台灣第一台8位元 ê 電腦，彼當陣毋但tī 國內真奢颺，就連tī美國、日本展覽mā是人人呵咾，會當講小教授1號是台灣電腦ê祖先輩。

馬蒂！你ê資料庫內底敢有1980年代全球lóng teh 痟 ê apple2？彼當陣連仿ê mā 賣kah 美金300-400箍，差不多是台票1萬箍，莫想講1萬箍俗俗ah無算貴，對彼時陣來講，這个價數是普通家庭幾若年ê粒積。但是，彼陣台灣ê宏kî公司提代理ê Zilog公司in ê 半導體零件，揣tio̍h製造koh較輕較po̍h ê 電腦ê方式。

有一工，in就宣佈講in出一款新ê產品「小教授1號」。干焦70箍美金，kah 彼當陣其他上無ài 300至400 ê電腦來比，是真正俗kah袂講tit。所以講，馬蒂阿！緊更新你ê資料庫，咱beh hōo 台灣電腦ê祖先輩「小教授1號」轉去伊的年代風神一下！

馬蒂！這是佗位？咱敢若來一个足神奇ê所在。Eh？竟然koh有鏡頭teh kā 咱翕。馬蒂，替我揣看覓科技資料庫內底ê資料。喔!原來這是是公共電視第一代ê標準畫質數位電視設備，咱敢若咧見證歷史，看tio̍h這台設備就親像來到彼个猶teh轉型ê時代。
啊！我想tio̍h矣！西元2001彼年咱開始建設數位發射台huat-siā-tâi，數位電視節目mā開始矣！西元2004年，這是咱頭一改大聲講咱「正式行入數位元年」彼一年，毋過，其實ài等到西元2012年6月30日，台灣無線電視才全面轉換tsò數位化訊號sìn-hō，這个時陣咱才有正式行入「數位電視元年」。
啥？你講公視ê水果阿媽就是tī 遮開始全數位製作放送！這是我做囡仔會時陣真重要ê記持。馬蒂！咱ài趕緊來kā電視台ê數位電視設備修理好，hōo我的囡仔時代猶看會tioh數位ê水果阿媽！

馬蒂，你敢知影歐洲核子物理研究中心，tī 1980年代起ê地下磅空，彼時陣科學家利用128个加速艙予電子kah正電子加速kah相磅，正電子kah負電子敢若teh走相逐然後lòng做伙。若是用足緊ê速度共粒子挵予碎糊糊，都會出現閣較細粒的粒子，這款基本粒子號做quark。這ê計畫就是「高能正負電子對磅機LEP」計畫。

後來，研究中心koh開始一个新ê計畫，叫「大型強子對磅機LHC」。拆除原本彼台對磅機，保留磅空kah加速艙，因為有丁肇中先生鬥相共，咱有通保留這台銅製加速艙。
修理這你就ài較頂真leh，若是這台走去其他ê年代，是毋知會發生啥物代誌。

經過時空亂流了後，lóng tih beh毋知家己tī佗一个時代ah。這是啥hannh？哇！馬蒂！咱揣tio̍h天文子午儀ah！按呢就會當知影咱tī tueh ah！天文子午儀是20世紀初世界科技歷史上，上有代表性ê天文測量儀器。伊是測量恆星hîng-sing通過上接近天頂ê時刻，才來比對pí-tuì天文子午儀所在地sóo-tsāi-tē ê時間。也因為世界觸所在ê時間kah in 經度有關係，所以子午儀有測定地理經度ê功能。

咱這馬看tio̍h ê 這台G. Prin Paris子午儀是西元1920年法國Gautier公司生產ê。捌綴國民政府執行軍方kun-hong 大地tāi-tē 天文測量任務。後來才送去「中正理工學院測量系」伊比咱去過ê國家koh較濟，這台也是全國唯一。

馬蒂，修理這台子ngóo儀ê時一定ài 細膩，按怎早前ê人才袂舞毋著時間kah空間。

馬蒂，你敢知影觀測太陽烏子有兩種方法，是直視法kah投射法，這馬你看著ê這个設備，是西元1967年交通部電波研究所tī桃園設ê太陽烏子觀測設備。

馬蒂，你來kā我教講beh 按怎使用這个設備，我有小可仔袂記得。第一步，需要tī千里鏡ê目鏡頂懸tàu一塊投射板，第二步，觀察太陽ê影相tī這塊板仔ê投射，第三步，觀察太陽ê表面出現ê烏子數量kah範圍。按呢lán就通了解太陽有啥物款ê活動，這寡活動對地球電離層tiān-lī-tsân有濟濟影響，尤其kah咱使用網路、uán距離kī-lī通訊真有關係。

馬蒂，這个觀測設備實在足厲害，這馬，咱ê任務就是修理好這个設備，繼續來研究太陽ê神祕sîn-pì。

歡迎加入地球拍火隊ê hâng-lia̍t！
我是設計師康梅，負責tshuā各位去全世界解決地球發燒ê問題。頭起先，ài 先hōo lín 了解地球現此時ê 狀況。

這馬你所看著的這條紅線，記錄咱地球自古到今每一个時期平均溫度的變化。地球ê khì-hāu 隨時teh 改變，親像咱人ê心情仝款，有時陣歡喜，有時陣受氣。

毋過，自工業革命人類發明各種機器、消môo各種資源，致使地球tī 20 世紀開始發燒，而且是燒kah 真厲害，較贏過去1300外年。這就是人類這馬 上傷重ê麻煩--全球暖化。

做陣出發！地球拍火隊！這馬需要咱來鬥相共，hōo地球緊退燒，才通拯救全世界，若無，地球破病 矣，萬物若有通好好仔生活？

咱來到這个研究「溫室氣體」ê所在。其實，產生「溫室氣體」無完全是䆀代。你敢知？太陽逐工炤來地球的，有看會著的日頭光佮看袂著的輻射。輻射本身嘛有jia̍t-lîng，咱ê大氣層敢若是棉襀被，kā一寡能量留tī地球，其他--ê反射轉去宇宙。能量有一部份會hōo地表來吸收，致使平均溫度維持 tī 人類適合生存ê範圍，這就是新奇ê「溫室效應」

自工業革命以來，咱排放傷過濟ê溫室氣體，親像kā地球蓋幾若領棉襀被。溫室效應傷過厲害，地球mā愈來愈jua̍h。水氣是溫室氣體當中比例上懸煞無啥人注意著的氣體。每一種溫室氣體有無仝特性，hōo氣溫上升ê程度無仝，這叫做「升溫特性」。雖然二氧化碳升溫特性毋是上厲害--ê，毋過因為咱大量排放ê關係，所以二氧化碳tuì溫室效應ê影響上濟。

Tī你ê倒手爿有一ê攏是疑問號ê牌仔，頂懸所寫ê就是咱定聽著--ê「溫室氣體」ê種類，掀看覓，就通了解產生遮ê氣體上主要的原因，若有基本ê認捌，食著藥，青草一葉。

咱先來了解大海調節氣候ê祕密：「溫鹽環流」。

「溫鹽環流」是因為海水ê溫度kah鹽份無仝所致。你想看覓，咱徛佇寒kah咇咇掣ê 北極，sì-tsiu-uî 攏是冷冰冰ê海水。遮的溫度低、鹽hun 重，密度比一般海水重，就沓沓仔沉lo̍h--khì，捒對熱帶的海洋過去。Tī另外一爿低緯度地區，親像烏海水kah灣流這款溫暖ê海水就會流按南北極去。這二款海水就tī大海內底循環，這就是「Un-iâm khuân-liû」！就親像咱地球ê冷氣佮燒氣，in來調節地球ê溫度，hōo氣候穩定。

毋過，全球氣溫提升，m̄-nā造成洋流體系改變，sīm-tsì影響大海生物生存ê範圍。科學家非常煩惱，準講溫度繼續提高，本底的海冰會溶去，予海裡的汫水增加，表層海水的鹽分、密度無夠重，無法度沉落去深海，「Un-iâm khuân-liû」tsua̋n停止運作，影響全球氣候。M̄-nā是按呢，南極的陸冰溶去閣會致使海平面衝懸，咱會當蹛ê所在 愈來愈少，所以，咱必須ài來保護地球，hōo新奇ê「Un-iâm khuân-liû」繼續循環--lo̍h-khì。

你kám bat聽人講反照率hām khì-hāu ê 關聯 ？無要緊！聽我說--來。

進前bat講過，對太陽輻射過來地球的能量。有ê--會留tī大氣層，有ê--會hőng反射tńg--khì 宇宙。反照率簡單來講，就是物件反射日頭光的比率。共所有的光線攏總反射，反照率就是1；若無反射半滴光線，反照率就是0。反照率ê變化就親像是咱今仔日穿白色ê衫，會使反射較濟ê日頭光，所以咱會感覺較涼，若穿烏色ê衫會吸熱，所以感覺較jua̍h。

這馬你ê面頭前有一个神奇ê箱子，請你輕輕仔共銀幕徙振動，就會使比較冰原、海水、陸地lio̍k-tē kap 沙漠ê反照率。你敢有發現冰原ê反照率上懸？遮--ê冰若像地球ê冷氣，用冰𫝏空氣kah海水，kā太陽ê 輻射反射轉去太空。毋過，全球暖化煞hōo北極冰層ê範圍減少、愈來愈薄。海面ê冰層若一大面鏡，kā大部份ê輻射反射轉去。無冰層的海水會吸收太陽的熱，海水的溫度提高會予邊仔的冰溶閣較緊，這就是地球ê溫度調節器歹去出現ê「白色警戒」

氣候變遷tuà-lâi êm̄-nā是氣象問題niā-niā，是相連紲ê連鎖反應，互相影響愈來愈嚴重。

pí-lūn 講農作物會因為氣候改變受著影響，親像大水雨抑是khó-uānn這款ki̍k-tuan天氣攏會破壞農作物 ê sing-tióng，影響咱食物ê kiong-ìng。而且，全球ê生物系統mā全然受氣候變遷影響，生物地界改變。親像蠓仔kah病菌會因為氣候變遷湠開天狗熱kah 一寡thuân-jiám病真緊就tòo kah 規四界。這幾年的高溫已經tuì人類健康kah性命造成危害。
遮--的變化，毋但是改變自然環境niā-niā ，閣會影響政治、社會 、經濟穩定等等。糧食、水、能源欠缺，可能引起真大ê問題，影響咱ê日常生活kah社會運作。

這陣，你面頭前ê是地球拍火隊長年收集ê資料，遮有記錄氣候變遷相連紲ê連鎖反應，選一項á來研究！

恁敢知影台灣是偌爾á媠？煞落來，hōo我來介紹我ê故鄉--台灣，tī全球上大的大陸--歐亞大陸kah全球上大ê海洋--太平洋之間ê就是咱美麗ê島嶼：台灣。

台灣是一个少年島嶼，tī 400萬年前，才因為一改tsō山運動來出現。台灣拄好tī khuân太平洋火山tài，因為板塊運動定定地動，台灣島差不多有268座超過3000公尺ê懸山，台灣第一懸山是tih欲有4000公尺ê玉山。敢有看著tuì北到南綿延ê山脈，kā島嶼分做不工款的氣候變化，東西南北因為落雨kah溫度無相仝，看會著完全無仝ê風景。台灣雨水充足，會當感受著5、6月黃梅時tseh，7月至10月風颱來，驚天動地。

台灣島全島有 熱tài、A熱tài、溫tài 不工款ê自然生態，tuì頭前ê剪紙藝術揣看覓，遮有tsē-tsē 台灣在種ê生物。

台灣ê氣候有ti̍k-sû 性，所以台灣ê科學家互相合作，開發有台灣特色ê氣候模式：台灣地球系統模式。這个系統加入有台灣周圍ê特色資料，親像是季風、iông-liû、水氣tuì-liû等等，hōo bôo-gí ê結果koh較接近東a kah 台灣環境狀態ê氣候。

這款系統需要真濟單位來siu-tsi̍p天氣資料，若是teh 懸山抑是無jîn-ian ê 所在建立氣象站來收集資料是真khùn-lân。所以，kàu-tann是用數學運算ê方式來呈現補足資料不足ê部份，氣候ê研究就bē koh受tio̍h 氣象站ê分佈kah數量ê限制，會當得tio̍h完整連紲ê資料。這寡資料會當幫助相關政策ê規劃，有hōo台灣提早做準備、減少氣候變遷ê路用。

uī-tio̍h 推測未來ê氣候，科學家利用超級電腦ê運算，設定未來溫室氣體排放ê情形，模gí 推測可能有--ê氣候變化。Tsit-má，tī 你面頭前ê是「氣候分析gî器」，用它來了解溫度懸低kah全球二氧化碳數字kah 伊ê年代！

地球拍火隊！這改lán換一个角度來面對咱ê大敵人--氣候變遷，咱總算tshuē tio̍h 應對 ê 辦法矣！就是「減少」kah「調sik」，「減少」主要是盡量減少溫室氣體ê產生，ah-nā 「調sik」就是透過逐家鬥陣phah-piànn，選ti̍k 永續發展ê生活方式。按呢聽起來霧嗄嗄 齁？無要緊！咱先來了解關kiān字：淨零排放、能源tsuán-hîng。

tsīng-lîng pâi-hòng已經是全世界共同ê目標，伊的意思是減少人為活動所排放ê溫室氣體。這m̄-nā是針對工業活動niā-niā，食物製作、交通工具攏ài考慮tio̍h減tsió 碳排放。因為按呢，減碳生活、tsiat約能源、循環經濟lóng是咱ài共同拍拚ê目標。

Tī咱台灣，雖然天然資源有限，進口資源ê比例是97％。若想beh tī 2050年進前完成能源轉型，咱ài 加強潔凈能源ê發展。台灣是一个四箍圍是海ê島嶼，有充足ê太陽能、海洋能、tē jia̍t 能，若是咱會當好好仔開發tsia ê再生能源，就會當減少溫室氣體排放、kā淨零排放做kah到。避免 台灣tú tio̍h能源安全、氣候變遷二項危機。

Tī 海沙埔散步，海沙埔會有真濟跤跡，按呢你敢知影sánn-mih̍ 是碳跤跡 kah 水跤跡？

「碳跤跡」就是咱逐日活動產生ê溫室氣體ê 衡量標準。咱出去食lim sńg樂暢，抑是teh厝--ê 上網phah 電動、吹冷氣，攏tī 無形 中留落真濟「碳跤跡」。你看頭前彼个統計表，吹冷氣一點鐘就產生0.621公斤 ê碳跤跡。仝一个意思，咱使用水資源ê時陣，mā有「水跤跡」。水跤跡mā叫做「hi-gí水」，也是咱tī產生物件ê過程中所用掉ê 水量，雖然水敢若用bē完，會當自然循環再生，實際上全球ê水資源一點一滴teh減少，水資源ê管理mā愈來愈重要。

「台灣碳標籤」是 khuân-pó s ú tshui-sak ê 政策，透過這个標籤，咱會使清楚了解咱ê消費行為 tuj地球ê影響，咱會使選一寡碳排放較低ê siong品，做對地球 koh 較友善ê選擇，所以，hōo咱來為地球做伙拍拚！

工業革命以來，khuân 境長期hőng 破壞、影響氣候嘛造成真濟生物ê生存危機。人類想欲hōo 一切 huê-ho̍k，想真濟補救辦法，毋過，干焦補救是無夠--ê，咱愛更加主動才會使！這馬，咱來到這个研究「循 khuân 經濟」ê所在，做伙來看「循 khuân 經濟」是按怎改變咱ê生活 kah 世界！

「循 khuân 經濟」就是以大自然 uî-su，追求資源系統ê pîng-hîng，資源ē-ī ng-eh koh 再使用、koh 再製造、koh 再回收是上主要ê目標。hōo資源一個接一個一直傳落去，所有舊ê物件重新發揮伊ê價值。「循 khuân 經濟」所想像ê未來，是咱生產ê每一个產品lóng 經過設計，會使tī幾若ê循 khuân 來使用。

而且，所生產ê副產品或者是pháinn--khì ê 產品bē 變做無路用ê「糞埽」，會當是新ê原材料抑是素材。台灣這幾年抑拍拚teh 推動循環經濟，產業發展對「khai-tshái、製造、使用、hìnn-sak」ê直線式經濟，轉型做「資源íng-sio̍k」ê循環經濟。Hōo資源直直循環，來kiám-uān 廢棄物kah u-jiám ê 問題。

Tī 你面頭前ê是世界逐所在kah台灣推動「循環經濟」ê例，做伙來欣賞。