葉石濤文學紀念館（臺文）

為著欲紀念臺灣當代文學作家葉石濤先生，本館對2012年起，設佇臺南市中西區友愛街8-3號。全館參觀免費，閣有閱覽區，歡迎逐家提一本冊，坐落來，享受一下仔文學的養分。

館內保存葉石濤先生的藏書、逐日寫作的椅桌，展出伊的人生大代誌、文壇朋友訪談的影片、專題影片等等。猶有石濤先--ê 筆下的府城文學地景路線圖。

本館建物是 市定古蹟 原早是山林事務所

山林事務所佇日本昭和年間(1925-1945)起造，專門負責培育、管理林產。日本昭和17年(1942)佮曾文溪森林治水所合併，改做臺南山林事務所，兩冬後閣改號做臺南州產業部林務課。戰後又閣改名叫臺灣省林務局嘉義林區管理處臺南工作站，了後單位徙位，建物就予市政府接管。

建物徛佇友愛街佮中正路五巷雙叉路口，坐南向北，長株形地基，兩層樓懸。對外口觀察推斷，量其約仔是lâm-á-khóng加強磚造，厝蓋四爿趨崎瀉水，烏瓦鋪面，厝脊佮規帶用鬼瓦收頭。

西爿面仔起一堵兩米懸的牆圍，東爿是早前的臺南州廳，北爿是圖書館，三爿圍起來做內埕。園仔內青phiàng-phiàng，種幾若欉大樹。其中兩欉南洋杉仔咧欲三層樓懸，量其約仔是民國40年(1951)種--ê，經過久年風雨，相隔30公尺，攏伸向正手爿去。兩欉樹仔倚做伙，佇民間予人號做「翁某樹」。建物規个表面分做洗石仔基座、紅磚仔牆、厝蓋三个部份，外面牆仔有大片戮空，一樓做小可彎曲的窗仔，二樓做圓箍仔窗，頂面做突歸。正面向南的牆仔兩爿對伨，一樓中央窗仔門頂懸突六支架仔出來，佮平平的簾簷相接。東西兩爿鰲頭壁的風窗突出來，下底斜角的杉仔箍閬一縫一縫，有過風透氣的效果。